Hargeysa(haqayonews.com)Waxa maanta si rasmi ah xilkii madaxtinimo ee Somaliland ula wareegay Madaxweyne Axmed Maxamed Maxamud Siilaanyo oo maanta loo dhaariyay shanta sano ee soo socota inuu Dalka maamulo
Munaasibad balaadhan oo loo sameeyay xaflada xilwareejinta ayaa maanta lagu qabtay Qasriga madaxtooyada, waxaana ka soo qayb galay wufuud balaadhan oo ka socotay Dalalka Jabuuti, Itoobiya iyo Kenya kuwaas oo ay ka mid ahaayeen wasiiradda dhaqanka iyo Dalxiiska ee Itoobiya, wasiirka warfaafinta Boosaha iyo Isgaadhsiinta ee Jabouti iyo Guddoomiye ku xigeenka Kowaad ee Baarlamaanka Kenya kuwaasoo hogaaminayay saraakiil farabadan oo ka tirsan Xukuumadahooda
Guddoomiyaha Maxkamadda Sare ayaa ugu horeyntii Madaxweyne Siilaanyo iyo ku xigeenkiisa Saylici ku dhaariyay Dhaarta Distooriga ah ee Dalka inay u maamuli doonaan si daacadnimo ah, dhexdhexaadnimo ah, ilaalin doonaan shuruucda Dalka u taala, isagoo Siilaanyo khudbad kooban oo dhaarta kadib halkaas ka jeediyay ku sheegay Xukuumaddisa inuu ku dhawaaqi doono berri isla markaana uu jeedin doono khudbadiisa Madaxtinimo

intaa kadibna waxa khudbadii ambabaxa halkaas ka jeediyay Daahir Rayaale Kaahin oo balan qaaday inuu Siilaanyo Xukuumaddisa la shaqayn doono, Daahir Rayaale Kaahin Madaxweynihii hore ee Somaliland waxa uu ka waramay Sooyaalkii Siyaasadeed ee Mandaqada uu la lahaa mudooyinkii kala duwanaa ee uu xilka hayay gaar ahaana waxa uu farta ku fiiqay Dawladda Jabuuti iyo Itoobiya oo uu sheegay markii uu talada kala wareegay madaxeynihii hore ee geeriyooday inay si fiican u gacan qabteen isagoo Siilaanyana ku dardaaray inuu xidhiidhka dalalkaasi sii xoojiyo, isagoo tilmaamay inay albaab u yihiin aqoonsiga Somaliland
Rayaale waxa uu si geesinimo ku jirto u qiray xisbiga Kulmiye inuu Doorashadii kaga Guulaystay isagoo saaxiibadiisa UDUB uga Mahad celiyay inay ku taageereen Go’aankii uu ku aqbalay natiijadii Doorashada, waxaanu xusay isaga iyo xisbigiisuba inay u jideeyeen Xisbiyada inay sidaas oo kale u aqbalaan Guusha haddii tartanka lagaga adkaado

 

 

 

 

 

 

 

Haqayonews.ocm- Hargeisa -somaliland

 

haqayonews@hotmail.com

 

kayse aden

Report - HN ONLINE